Monday, October 5, 2009

SASTERA DAN BUDAYA

Sajak


Jalan Leklok Yo!


Bominyaklah muncung kau jang!

Orang moleh kobau balar,

kenduri godang

kek Bagan Pinang.


Hobin boto-boto jang oi!

Bilo lak lai

nak moraso.

Tompi janganlah amik upah

pacak bendero tampa postar jo

sikit bona upah eh tu!


Kau mintak jadi ejen

jua orang boli orang

banyak kemesyen eh!

Macam broker tanah, kayo rayo!


Dapek duit tu jangan pulak kau minum todi

macam kapa karam lak kau sok.

Kok kek Pahang

kono sobat,

bobilur punggung!


Kau lak jangan momokak,

kono dendiam,

kau ontok yo,

tompi kono rajin ngulor

salam

maso ni montori

sodo eh nak berkawan

tompi kok dimintak eh kau

ngecekkan jando

minta duit dulu.

Kok kono tangkap basah

molopeh kau tak moraso.

Pot Deksen ni tukang tangkap basah

gomar nangkap montori!


Ingat posan den tu jang!

Jalan leklok yo!

Dapek duit tu bagi den sikit yo!

Den nak boli toropong

Nak skodeng Dak Isa ngali duit!


---Yassinsalleh

1351 hrs. sept 30.09

Nak nengok air bokojar poilah pot desen jang oi!

No comments: