YASSINSALLEH BERPUISI...

Selamat Hari Ibu, Omak!

Sompono Hari Ibu
hari ni den bawak
omak den ko pot deksen
nengok air bokojar.

Maso den kocik-kocik
orang-orang pokan somban
gomar bonar monggiat:
"Kau poi pot deksen
nengok air bokojar yo jang?"

Yolah capolah den,
niang uwan den marin
orang Koru Morobau Moranting
Tu Kikir
morantau pulak ko Polangai
niang atuk den
pum tanah di Mancis
tumpahlah darah
kolahiran den di Ponson
longang dah kampung den ni
sodo eh dah pindah ko Sophie.

Mulo ee pindah dulu tu
korah dek orang putih
'porentah bokorung emojensi'
duduk dalam pagar
kawat boduri
makan nasi kawah
pakai kat ngambik ee
sekso boto idup
buek dek orang putih
keminis pulak tu
goma bona bakar bas
sekso boto idup maso tu.

Tompi sekso-sekso
idup maso tu
orang putih buek
undang-undang emojensi
nak molawan keminis.

Hari ni pulak
orang bosar kita
kojo ee lain takdo
mombolit undang-undanglah pulak
yang bulih kato ee tak bulih
yang tak bulih dibulih ee pulak.

Ontah apo nak jadilah
bangso kito ni
dulu musuh kito keminis
ni sumo ee dah jadi toke koporat
jadi montori pun ado
yang jadi montori
kek montori pun ado yo
tak somonggah boto
sodo ee koparat!

Dah tuo rento den ni
Pot Deksen bokojar yo air ee
macam maso den kocik-kocik
tompi maso tu
kito kona capo
musuh kito ni keminis dah takdo
tompi, wajib mustahil
dah boronti pulak dio
bokojar!

Dari kocik sampai bosar
sampailah ko tuo
air pot deksen
totap yo bokojar
tompi bangso den
botambah nak moda
Selamat Hari Ibu, omak!

-Yassinsalleh
jam 0557
Mei 10, 09
Menjunjung Kasih Ibu
omak den!
Avillion Admiral Cove,
Port Dickosn, N9.